“QAYA” DÖVLƏT ANSAMBLI TƏQDİM EDİR: JAZZ FANTAZİYALARI Hörmətli musiqisevərlər! 2024-cü ildə aprel-may aylarında Ü.Hacıbəyli adına Bakı Musiqi Akademiyasının, ADA Universitetinin təşəbbüs və layihəsi üzrə və Mədəniyyət Nazirliyinin təşkilati dəstəyi altında Bakı Beynəlxalq Caz Günü tədbirləri keçiriləcəkdir. Silsilə “Qaya” Dövlət Ansamblının konserti ilə başlanır. Konsertin ilk hissəsində görkəmli Azərbaycan klassiki Üzeyir Hacıbəylinin “Arşın mal alan” musiqili komediyasının mövzuları əsasında işlənilmiş fantaziya səslənəcəkdir. Layihənin rəhbəri və xor səhnələrinin aranjiman müəllifi müasir “Qaya” Ansamblının yaradıcısı, Xalq artisti Rauf Babayevdir. Fantaziya nömrələrinin orkestr üçün aranjimanı isə bəstəkar Nazim Əhmədovundur. Konsertin ikinci bölməsində Ansamblın ifasında caz musiqisinin məşhur vokal və instrumental standart mövzularını dinləyəcəksiniz. “Qaya” Dövlət Ansamblının caz repertuarındakı yeni kompozisiyalarla da tanış olacaqsınız.