COP29 “Yaşıl Zona”iştirakçıları konfrans şatllarından bileti təqdim etməklə ödənişsiz istifadə edə bilərlər.

COP29 Yaşıl Zona biletləri

11-22 noyabr tarixlərində Bakıda keçiriləcək COP29 iqlim konfransı çərçivəsində təşkil edilən Yaşıl Zona COP29-un geniş ictimaiyyət üçün açıq olan hissəsidir.

COP29-un Yaşıl Zonası COP29 Sədrliyi tərəfindən təşkil və idarə edilən, müxtəlif icmaların iştirakı, texnoloji həllər və qlobal əməkdaşlığa yönəlik olan bir məkandır. Yaşıl Zonada iqlim məsələləri ilə bağlı müxtəlif maraqlı tərəflər - dövlət və özəl sektor təmsilçiləri, media, elm adamları, ekspertlər, yerli icmalar, vətəndaş cəmiyyəti institutları və rəsmi Mavi Zona nümayəndələri olmaqla geniş iştirakçı auditoriyası bir araya gələcək.  

COP29 Yaşıl Zonada iştirak edərək qlobal iqlim fəaliyyətinin bir hissəsi olmaq üçün biletləri onlayn qaydada ödənişsiz şəkildə əldə edə bilərsiniz.  Biletlər, konfransın keçirildiyi müddət ərzində hər gün üçün ayrı-ayrılıqda təqdim olunacaq. Konfransın dayanıqlılıq prinsipləri nəzərə alınaraq, elektron biletlərin çap edilməsi və kağız daşıyıcıda təqdim olunması tələb edilmir.

Daha ətraflı məlumat COP29 rəsmi veb saytının müvafiq bölməsindən əldə edilə bilər.  

Müştərilər tədbirin hər bir tarixi üçün bir şəxsiyyət vəsiqəsi ilə yalnız bir bilet əldə edə bilərlər. Təkrar eyni tarix üçün eyni vəsiqə ilə bilet əldə etmək mümkün deyil.

Yerli vətəndaşların şəxsiyyət vəsiqəsi ilə, xarici vətəndaşların isə passport ilə tədbir məkanına yaxınlaşmağı zəruridir.

COP29 Yaşıl Zonaya giriş 6 yaşdan yuxarı olan uşaqlar və böyüklər üçün açıqdır. 6 yaşdan 18 yaşadək olan ziyarətçilərin Yaşıl Zonaya daxil olması üçün biletin əldə edilməsi tələb olunur və onların Yaşıl Zonaya girişinə yalnız böyüklərin müşayiəti ilə icazə verilir.