Hər il böyükdən kiçiyə hər kəsin səbirsizliklə gözlədiyi sehrli bir bayram var – Yeni il. Xüsusilə uşaqlar üçün bu bayram unikal və yaddaqalan olur. Yeni il, hədiyyələr və ulduzlarla dolu bir gecə olmaqla yanaşı, bəzən böyüklərin unudduğu o nağıl dünyasını yenidən canlandırır. Biz, Azərbaycan Gimnastika Federasiyası, bu bayram ərəfəsində uşaqlara yenidən həmin sehrli nağıl dünyasına qapı açırıq.
16 Yanvarda Milli Gimnastika Arenasında keçiriləcək “Şelkunçik” adlı əyləncəli Yeni il şousunda, Klara və Şelkunçik ilə birlikdə sehrli və macəralarla dolu bir fantastik dünyaya səyahət edəcəyik. Tamaşaçılar dörd möhtəşəm diyarda unudulmaz anların şahidi olacaqlar. Gəlin, Klara ilə birlikdə sehrli dünyalara yelkən açaq və bu Yeni ili əfsanəyə çevirək!
