Lənkəran Tarix-Diyarşünaslıq Muzeyi 1913-cü ildə inşa olunmuş Mir Əhməd Xanın evində yerləşir və 1991-ci ildən muzey kimi fəaliyyət göstərir. Üçmərtəbəli, 12 otaqlı binada Lənkəranın qədim tarixini, mədəniyyətini və bu gününü əks etdirən 8 mindən çox eksponat qorunur. Muzeyin ekspozisiyası altı bölmədən ibarətdir: təbiət, qədim dövr, orta əsrlər, yeni dövr, ən yeni dövr (1917–1945), müasir dövr (1945-dən bu günə qədər). Burada arxeologiya, etnoqrafiya, numizmatika nümunələri, xalq tətbiqi sənəti, eləcə də görkəmli şəxsiyyətlərin sənədləri nümayiş etdirilir.

2013–2015-ci illərdə muzey əsaslı bərpa olunmuş, Azərbaycan Prezidenti İlham Əliyev yenilənmiş şəraitlə tanış olmuşdur.

Muzeyin banisi, maarifçi, şair və jurnalist Mirzə Ağəli Əliyevdir. O, Lənkəranda ilk xalq muzeyinin yaradılmasına təşəbbüs göstərmiş, Moskva, Sankt-Peterburq və Bakı muzeyləri ilə əlaqə saxlamışdır. Eyni zamanda Cəlil Məmmədquluzadənin dostu, general Həzi Aslanovun müəllimi kimi tanınmışdır.