Qobustan Palçıq Vulkanları Turizm Kompleksi

Palçıq Vulkanları Turizm Kompleksi

Azərbaycan planetimizdə palçıq vulkanlarının geniş yayıldığı region kimi tanınır. Yer kürəsində məlum olan 2000-dən artıq palçıq vulkanlarının 350-dən çoxu Azərbaycanın şərqində və Xəzər akvatoriyasında yerləşir. Palçıq Vulkanları Turizm Kompleksi onlardan bir qrupu - "Qılınc" palçıq vulkanları ilə tanışlıq imkanı yaradır. 

“Qılınc” palçıq vulkanı Bakıdan 59 km, Arzani palçıq vulkanından 4 km məsafədə yerləşir. Ümumi sahəsi 12 ha olan Turizm Kompleksinin ərazisində turistlərin vulkanları izləməsi üçün piyada yolu çəkilib, hündürlükdə müşahidə nöqtəsi və meydança salınıb.

Kompleksin informasiya mərkəzində palçıq vulkanlarının xüsusiyyətləri, təbii və müalicəvi özəllikləri haqqında maraqlı məlumatları əldə etmək mümkündür. Buradakı emalatxanada dulusçuluq və neftdən rəsmlərin çəkilməsi üzrə master-klaslar təşkil edilir.

Kompleksin Təbiət tarixi Sərgisində Azərbaycan və dünya faunasına aid olan 98 heyvan skeleti, 870 müxtəlif növ qurudulmuş həşərat, bir sıra sürünən və suda-quruda yaşayan heyvanlar, həmçinin paleontoloji eksponatlar nümayiş etdirilir.  Uşaqları maraqlandıracaq sərginin mərkəzi hissəsində zürafə, Asiya fili, ikihörgüclü dəvə, qonur ayı, maral kimi iri heyvan skeletlərini görmək olar.

Kompleksin Minerallar sərgisində respublikamızın ərazisindən tapılan 80-ə yaxın fərqli növ minerallar - nadir qiymətli daşlar, kristallar və geoloji nümunələri görə bilərlər.

Palçıq Vulkanları Turizm Kompleksini ziyarət edən turistlər burada həm də əyləncəli vaxt keçirə bilərlər. Kompleksin ərazisində  kvadrosikllər və ya qolf maşınları ilə ekskursiyaya çıxmaq, günün sonunda isə müasir dizayna malik kafedə dincəlib ləzzətli yeməklərin dadına baxmaq olar. 

Azərbaycanın palçıq vulkanları ilə tanışlıq ziyarətçilərə planetimizin möcüzəli təbiət hadisəsini izləmək, Yerin geoloji quruluşu barədə bilgilərini dərinləşdirmək üçün unikal fürsət yaradır.