Ramana Qəsri Bakı şəhərinin Ramana qəsəbəsində yerləşən orta əsr müdafiə memarlığı abidəsidir. Qala Şirvanşahların əmri ilə XIV əsrdə inşa edilmişdir. Bəzi tədqiqatçılar isə onun tikilməsini XII əsrə aid edirlər.

Qəsrin daxili həyəti 28 × 10 metr ölçülərindədir. Xarici divarlar künclərdə və divar boyunca yerləşən yarımdairəvi müdafiə bürcləri ilə möhkəmləndirilmişdir. Giriş hissəsinin üzərində müdafiə məqsədli kvadrat qüllə yerləşir. Dairəvi donjonlardan fərqli olaraq, Ramana qəsrinin kvadrat formalı baş qülləsi dörd mərtəbədən ibarətdir və bu xüsusiyyət onu Azərbaycanın orta əsr qalaları arasında fərqləndirir.