Noyabrın 14-ü və 15-də Milli Gimnastika Arenasında “Ocaq Sport” klubunun bədii gimnastika üzrə B kateqoriyasına aid açıq birinciliyi keçiriləcək. Yarışda "Ocaq Sport” Klubunun paytaxtla yanaşı, Ağdaş bölməsi, İxtisaslaşdırılmış Olimpiya Ehtiyatları Uşaq-Gənclər Gimnastika Məktəbi (BGM), Su İdmanı Sarayı, “Grasiya” İdman Klubu, Zirə Mədəniyyət Mərkəzi, Gəncə Olimpiya İdman Klubu, “Kür” Olimpiya Tədris-İdman Mərkəzi (Mingəçevir), “Qədiroğlu” İdman Klubu (Mingəçevir), Talaçay Kompleksi (Zaqatala), Oğuz OİK, Qəbələ OİK, Qax OİK, Qusar OİK, Göyçay OİK, Abşeron OİK, Gəncə OİK, Şağan OİK, Şəmkir OİK, Şirvan OİK, Sumqayıt OİK-i təmsil edən zərif gimnastlar çempionluq adı uğrunda mübarizəyə qoşulacaqlar.
Yarışda adıçəkilən klubları təmsil edən 200-dək idmançı kiçiklər (2016-2017-ci il), balacalar (2013-2015-ci il), yeniyetmələr (2011-2012-ci il) və gənclər (2008-2010-cu il) yaş kateqoriyasında xalça üzərində bacarığını nümayiş etdirəcək.
İki gün davam edəcək yarışda qaliblər yaş qruplarına və kateqoriyalara müvafiq olaraq ayrı-ayrı alətlər və çoxnövçülük üzrə müəyyənləşəcək.
Əziz gimnastikasevərlər, Milli Gimnastika Arenasına gələrək, bədii gimnastlara dəstək ola, onların maraqlı çıxışlarının şahidi ola bilərsiniz.
Yarış hər gün saat 12:00-da başlayacaq.
