COVİD19 pasportu və ya immun sertifikatı olmayan tamaşaçılar tədbirə buraxılmır və əldə olunmuş biletlər geri qaytarılmır!
10 sentyabr tarixində 3D Klubunun yaradılmasının birilliyinə həsr olunan "Məclisi - Üç" adlı təntənəli mərasim keçiriləcək.
Ötən ilin isti bir yay axşamı həmfikirlərlə 3D Klubu yaradılarkən məqsədimiz düşüncə və şüuraltının işgüzar və həyat münasibətlərində rolunun nə qədər önəmli olduğunun təbliği idi.
Gedilən yola baxdıqda bu fəaliyyətin isti izlərini cəmiyyətin müxtəlif təbəqələrində, xüsusən də iş adamları və gənclər arasında görmək şərəflidir. Bu yolda müxtəlif təlimlər, görüşlər, tədbirlər və seanslar həyata keçirmişik.
Zaman irəli səsləyir və 3D Klubu inkişafının yeni mərhələsinə keçidini də həmfikir dostlarla birlikdə qeyd etmək niyyətindədir. Təntənəli mərasimdə ötən dövrün fəaliyyətinə qısa nəzər salınacaq, dəyərli qonaqlarımızın ürək sözlərini dinləyəcək, 3D Klubunun veb-saytının təqdimatı ilə tanış olacaq, çay-qəhvə fasiləsində isə maraqlı və faydalı netvörkinq şəraitindən yararlanacağıq.
Tədbiri özünə məxsus edən isə nümayiş olunacaq tamaşalardır. ISO idarəetmə sistemləri üzrə mütəxəssis Vüsal Mahmudovun təqdimatında ISO 9001 standartlarının və Kvant Düşüncə Təlimçisi Cəfər İbadovun təqdimatında Həyat kouçluğu fəaliyyəti motivləri əsasında 3D Klubunun üzvləri - quruluşu rejissor Kamal Yaşar, ssenari müəllifi Pərviz Məmmədov olan 2 tamaşa da nümayiş olunacaq.
Rollarda müstəsna olaraq 3D Klubunun üzvləri - müxtəlif fəaliyyət sahələrində öz sözlərini demiş, cəmiyyətimizin dəyərli üzvləri iştirak edirlər.
3 saat davam edəcək tədbir Excelsior Hoteldə Afurja zalında baş tutacaq.
