Martin Mak Donah. “Yalqız Qərb” Quruluşçu rejissor - Yan Vilem Van Den Boş Böyük Britaniya İki gənc qardaşın simasında cəmiyyətin eybəcərlikləri açılır. Bu eybəcərliklər nədən ibarətdir? Köülmən atasını onun saç düzümünü lağa qoyduğuna görə öldürür. Qardaşlar bir-birindən ərzağı, içkini gizlədirlər. Uşaqlıdan yola getmirlər. Biri o birinin itinin qulağını kəsib, o biri oyuncağını sındırıb. Biri o birinin gözünə tüpürür, o birinin əlini yandırır. Qardaşlar bir-birini öldürməyə cəhd göstərirlər. Onların arasında olan bu intriqamı yığışdırmaq məqsədilə müqəddəs ata Uels əlini sobada yandırır. Istəyir ki, qardaşlar arasındakı qəzəb sevgiyə çevrilsin. Artıq cinayət törətmiş bu qardaşlar daha ağır cinayətlərə əl ata bilərlər. Biri atasını öldürüb, o biri isə bu cinayətin üstünü örtüb. Müqəddəs ata istəyir ki, qardaşlar münasibətlərini oturub çözsünlər. Sonra gedib gölün sahilində oturub o ki var içir. Bir məktub-vəsiyyətnamə yazıb qardaşlara ünvanlayır ki, onlar barışsınlar, bir-brini təhqir etməkdən, ölümlə intiqam almaq istəyindən vaz keçsinlər. Bu da cəmiyyətə mesajdır. O, özünü göldə boğur. Məktubda yazılanlar-müqəddəs atanın vəsiyyətində düşündürücü məqamlar çoxdur. O, bildirir ki, intihar etdiyi üçün cəhənnəmə düşəcək. Əgər qardaşlar barışıq elan eləsələr, o zaman onun ruhu o dünyanın əzabından xilas olacaq. Biz Qörlin adlı on yeddi yaşında bir qızla da tanış oluruq. O, evlərə araq paylayıb satır ki, Uelsə hədiyyə alsın. Çünki o, Uelsi sevir. Ondan mərhəmət umur. Ətrafdakılar ona yüngülməcaz bir qız kimi baxırlar. O isə həyatda öz səadətini axtarır. Lakin Uels üçün aldığı boyunbağı və ürək kloununu verə bilmir. Çünki Uels intihar edir. Məktubu gətirərkən, bu iki qardaşın evində boyunbağını qırıb yerə tullayır. Ona görə ki, hədiyyəsini verəcək insan artıq həyatda yoxdur. Qardaşlar arasında müəyyən mənada münasibət sabitliyi yaranır. Onlar bir-birinə səhvlərini etiraf edib üzr istəyirlər. Lakin onalrın bir-birinin qarşısında o qədər səhvləri var ki, bu qəzəb alovunu söndürə bilmir. Balin məktubu yandırmaq qərarına gəlir. Lakin son anda fikrindən daşınıb onu divardan hörmətli bir yerdən asır. Köulman əsəbdən evdən gedir. Baxmayaraq ki, Balin artıq qərara gəılmişdi ki, atasından qalan evin yarısını ona versin. Balin Uelsin ruhu qarşısında söz verir ki, bir də qardaşına araq almayacaq. Deməli, münasibət korlayıcısının başlıca səbəbi araqdır, anlaşılmazlıqdır, bir-birinin qəlbinə dəyməkdir. Beləliklə, müəllifin ideyası açıqlanır: insanlar yalnız o zaman nicat tapıb qulağıdinc yaşaya bilərlər li, bir-birini anlasınlar. Qarşılıqlı anlaşma və əlində olanı paylaşma qəlblərdə mehr və məhəbbət oyada bilər.