Azərbaycan Milli Xalça Muzeyində 800-ə yaxın eksponatdan ibarət zərgərlik kolleksiyası qorunub saxlanılır. Onların böyük hissəsi XIX əsrin sonu – XX əsrin əvvəllərinə, bir qismi isə Tunc dövrünə (e.ə. IV–II minilliklər) aiddir. Muzeyin Zərgərlik fondunda döymə, basmaqəlib, həkketmə üsulları ilə işlənmiş qadın bəzək əşyaları (sırğa, qolbaq, üzük, kəmər, boyunbağı, sancaq, düymə və s.) nümayiş olunur. Mingəçevir, Xocalı, Qəbələ, Xınıslı və Qaratəpədə aparılmış arxeoloji qazıntılar zamanı aşkar olunmuş bu bəzək məmulatları orijinal forma və dekor zənginliyi ilə seçilir. Məmulatların ümumi üslubu aid olduğu dövrün mədəniyyətinin xarakterinə uyğundur.
Muzeydə qorunan zərgərlik nümunələrinin böyük hissəsini (təxminən 600 məmulat) əsasən qadın zinət əşyaları təşkil edir. Bununla yanaşı, az sayda məişət əşyaları, ənənəvi qızıl və gümüş kəmərlər, çuxanın (kişi üst geyimi) vacib atributu olan vəznələr və s. kimi kişi zərgərlik məmulatları da var. Burada qarasavad, inkrustasiya, minasazlıq üsulu ilə işlənmiş silahlar da təqdim olunur.
