2024-cü il mayın 20-dən 26-dək Azərbaycanın paytaxtı Bakıda maraqlı idman tədbiri - 23 yaşadək güləşçilər arasında Avropa çempionatı keçiriləcək. 

Bu mühüm idman yarışında Avropanın ən güclü gənc güləşçiləri xalça üzərində bacarıqlarını nümayiş etdirəcəklər.

Bakı İdman Sarayında baş tutacaq qitə birinciliyi səhər və axşam olmaqla iki sessiada keçiriləcək. Səhər sessiası saat 10:30-dan 13:30-a, axşam seansı isə 16:45-dən 20:30-a kimi tamaşaçı və iştirakçılara gərgin mübarizə, maksimal adrenalin və unudulmaz təəssürat bəxş edəcək. Turnirin rəsmi açılış mərasimi mayın 20-də saat 17:30-da baş tutacaq. 20-22 mayda yunan-Roma güləşi, 22-24 mayda qadın güləşi, 24-26 mayda isə sərbəst güləş üzrə mübarizə baş tutacaq.

Bakıda ilk dəfə keçiriləcək U-23 Avropa çempionatı gəncləri idman vasitəsilə bir araya gətirməyi və beynəlxalq arenada idman nailiyyətlərini təşviq edir.

Yarış iştirakçılarını və tamaşaçıları turnir boyunca həyəcanlı qarşılaşmalar və emosional anlar gözləyir.

İdmanda ən yüksək zirvələrə çatmağı hədəfləyən gənc idmançıları dəstəkləmək üçün bizə qoşulun!