“Xalçalar diyarı” sərgisi görkəmli alim, Xalq rəssamı Lətif Kərimovun, müasir rəssamlar Mədinə və Nərmin Nəcəffin, xalçaçı-rəssam Yaşar Malfouzinin və bir qrup rəqəmsal rəssamın yaradıcılığını bir araya gətirərək xalçanı tarix və sənətkarlıqla formalaşan, eyni zamanda yeni interpretasiyalar, materiallar və texnologiyalar vasitəsilə daim dəyişən canlı bədii məkan kimi təqdim edir.
“Xalçalar diyarı” sərgisinin əsas ideyası odur ki, ənənə dəyişməz, sabit qala bilməz. O, ənənəvi biliklərin fərdi bədii yaradıcılıqla qarşılıqlı əlaqəsi, yenidən şərhi və transformasiyası sayəsində öz davamlılığını qoruyur. Sərgi boyunca xalça rəssamla sənətkar, rəsm ilə material, tarixi nümunə ilə müasir interpretasiya, əl işi ilə texnologiya arasında qarşılıqlı əlaqə məkanı kimi təqdim olunur. Hər bir transformasiya özündən əvvəlki yaradıcılıq mərhələsinə yeni yanaşma imkanı verir. Rənglər dəyişir, səthlər fərqli tekstura qazanır, rəsmə xas bədii ifadələr toxunmuş ilmələrdə təcəssüm olunur, tarixi kompozisiyalar müasir ustalar tərəfindən yenidən şərh edilir, ənənəvi motivlər isə rəqəmsal məkanda hərəkətə gəlir.
