Azərbaycan xalq nağılı “CırtdaNino”
Yaş həddi: 5+
Müəllif: Pərvin Nurəliyeva
Quruluşçu rejissor: Elşad Rəhimzadə
Quruluşçu rəssam: Nisə Həsənova
Bəstəkar: Cahangir Zülfüqarov (Əməkdar incəsənət xadimi)
Əsas rolların ifaçıları: Hüseyn Bayramov, Şəfəq Əliyeva (Əməkdar artist), Ramil Şamiloğlu, Hökümə Rəhimzadə, Elgün Yəhyayev, Xaliq Bəkirov, Kərəm Hadızadə, Zümrüd Quliyeva, Anar Səfiyev, İlhan Sadıqov, Mirzə Ağa Mirzəyev,
Tamaşanın müddəti: birhissəli, 1 saat
Azərbaycan xalq nağılı “Cırtdan” mifik bir məxluq olan Divdən uşaqları qurtaran Cırtdan adlı ağıllı bir oğlandan bəhs edir. Cırtdan Azərbaycan nağıllarının ən məşhur personajlarından biridir. Cırtdanın öz dostları ilə birlikdə divin evində keçirdiyi bir gecənin təfsilatı çoxlarının yadındadır. Div gecəyarı uşaqların yatdığı otağa daxil olub: "Kim yatıb, kim oyaq?" - deyə soruşmuşdu, Cırtdan isə ona: "Hamı yatıb,Cırtdan oyaq,"-cavabını vermişdi. Bu, xalq arasında geniş yayılmış bir məsəldir. Çünki hamı Cırtdanı sevdiyi üçün valideynlər də bu məsəldən istifadə edərək, zarafatla övladlarına “Cırtdan” deyirlər. Bizim də tamaşamız balalarımızın sevimli qəhrəmanı Cırtdana həsr olunmuşdur. Bəs, Cırtdanın başına hansı əhvalatlar gəlir?
Cırtdan qonşunun uşaqları ilə birlikdə meşəyə odun yığmaq üçün gedir. Geri qayıdarkən qaranlıqda yolu azırlar. Ona görə də uzaqdan gördükləri işığa tərəf irəliləyirlər. Nəhayət, Divin yaşadığı yerə çatırlar. Canavar gecə uşaqları yemək üçün özünə cəlb etməyə çalışır.
Uşaqların divdən xilası üçün Alimlər planetindən göndərilmiş Nino və onun həmkarları yer üzündə sülhü bərqərar etmək uğrunda mübarizə aparırlar. Dünyanın öz orbitindən çıxmaması üçün xeyirxah yadplanetlilər səylə çalışırlar. Nino Cırtdanı və dostlarını xilas edib, Alimlər planetinə aparır. Uşaqlar orada elm öyrənirlər və sağ-salamat öz evlərinə qayıdırlar.
Bu nağıl-tamaşa təbiəti qorumağı, dostluqda sədaqəti, həm də elmli və mübariz olmağı tövsiyə edir.
