İlqar Fəhmi. “Balaca kişilər”
Yaş həddi: 16+
Müəllif: İlqar Fəhmi
Quruluşçu rejissor: Nicat Kazımov (Əməkdar artist)
Baş rolların ifaçıları: Elnur Bəhramxan (Əməkdar artist), Bəhram Əliheydər, Araz Pirimov, Ceyhun Məmmədov
Janr: qəhrəmanlıq dramı
Tamaşanın müddəti: 1 saat 40 dəqiqə
Ölkəmizdə baş verən ictimai-siyasi proseslərə, bir yaradıcı təşkilat olaraq, daim öz münasibətini bildirən Azərbaycan Dövlət Gənc Tamaşaçılar Teatrı möhtəşəm qələbəmizdən dərhal sonra “Qarabağ – Vətən müharibəsi” movzusunda “2783...” adlı pyes müsabiqəsi elan etdi. Yazıçı-dramaturq İlqar Fəhminin “Balaca kişilər” pyesi müsabiqənin qalibi oldu.
Əsərin fabulasını maraqlı süjet xətti müşaiyət edir və dramaturji material janrın xüsusiyyətlərinə uyğun olaraq, qoyulan problem maraqlı həyat hadisələri ilə çözülür. Müxtəlif bölgələrdən olan əsgərlər vətənin yadelli işğalçılardan təmizlənməsi, torpaqlarımızın azad olunması uğrunda canlarını fəda edirlər. Onlar “balaca” kişilərdir: bığ yerləri təzəcə tərləyən, əlinə ilk dəfə silah alan, canını torpağına qurban verməyə hazır olan balaca kişilər. Biz həm də belə balaca kişilərin cəsurluğu sayəsində haqq uğrunda mübarizəmizi şərəflə başa çatdırdıq. Bu balaca kişilər sübut etdilər ki, əslində kişinin böyüyü, kiçiyi yoxdur.
44 gün ərzində savaş meydanında qəhrəmancasına mübarizə aparan ordumuzun rəşadətinə, möhtəşəm Zəfərin qazanılması uğrunda canını qurban verən igidlərimizin qəhrəmanlığına həsr olunan bu tamaşa həm də gənc nəslin vətənpərvərlik ruhunda tərbiyəsində mühüm rol oynayacaqdır.
