COVİD-19 pasportu və imun sertifikatı olmayan tamaşaçılar  tədbirə buraxılmır və əldə olunmuş biletlər geri qaytarılmır!

2 pərdəli balet

Fikrət Əmirov

«NİZAMİ»

(baletə qısa annotasiya)

Azərbaycan Respublikasının Prezidenti İlham Əliyevin sərəncamı ilə 2021-ci il "Nizami Gəncəvi ili" elan edilmişdir. Bu mühüm hadisə ilə əlaqədar  Azərbaycan Dövlət Akademik Opera və Balet  Teatrı "Nizami" baletinin quruluşunu həyata keçirib. Tamaşa dahi Azərbaycan şair və mütəfəkkiri Nizami Gəncəvinin 880 illiyinə həsr olunub.

SSRİ Xalq artisti, SSRİ və Azərbaycanın Dövlət mükafatları laureatı, görkəmli bəstəkar Fikrət Əmirovun musiqisi əsasında səhnəyə qoyulmuş tamaşa Teatrın dahi Nizaminin poetik sənətinin valehedici inciləri, onun çox şaxəli , mistik, cazibədar dünyası ilə əlaqə yaratmaq üçün bir təşəbbüsüdür.

Balet xoreoqrafik triptix kimi düşünülmüş və həyata keçirilmişdir. Tamaşada böyük şairin həyatının üç məqamı təsvir olunmuşdur.

Birinci məqam. Şair və hakimiyyət.

İkinci məqam. Şair və Məhəbbət.

Üçüncü məqam. Şair və ilham pərisi.

Nizami poeziyasının real və xəyali aləmi bu tamaşada vəhdət təşkil edir. "Zaman axını" böyük ustadın yaradıcılığının "Sirlər xəzinəsi"nin parlaq irsini açıb göstərir, sonradan "Əbədiyyət"ə (şairin ölümsüzlüyü) çevrilmək üçün "Tarixin səhifələri"nin (onun poemalarının canlanan qəhrəmanları) zamanı gəlir. Məşhur "Xəmsə"də vəsf etdiyi qəhrəmanlar onun gözləri qarşısından cərgə ilə ötüb keçir. Ölməz poemaların qəhrəmanları - Leyli və Məcnun, Xosrov və Şirin, Bəhram və Yeddi gözəl, İsgəndər... rəqslərdə canlanırlar.  Nə qədər ki, Yer üzərində məhəbbət, sədaqət, inam mövcuddur, nə qədər ki böyük Nizaminin poeziyası yaşayır, onun yaratdığı qəhrəmanlar da əbədi yaşayacaq və var olacaqlar!

Azərbaycan Dövlət Akademik Opera və Balet Teatrı üçün bu tamaşa həm də ona görə dəyərlidir ki, "Nizami" bəstəkar Fikrət Əmirovun qələmə aldığı son əsəridir (1984, yanvar).

Nizami Gəncəvinin dahiliyivə Fikrət Əmirovun əziz xatirəsi qarşısında baş əyərək Teatr böyük ehtiram və həyəcanla tamaşanı baletsevərlərin mühakiməsinə təqdim edir.