Azərbaycan xalça sənətinin görkəmli nümayəndəsi, Xalq rəssamı, ornamentalist və alim Lətif Kərimovun 120 illiyinə həsr olunan sərgi Azərbaycan Dövlət Rəsm Qalereyası tərəfindən təşkil edilir. Sərgi sənətkarın zəngin irsinə müasir bədii baxışı təqdim edərək milli sənət ənənələrinin yaşadılmasına və gələcək nəsillərə ötürülməsinə xidmət edir.
Lətif Kərimovun yaradıcılığı və elmi fəaliyyəti Azərbaycan xalça sənəti ənənələrinin sistemləşdirilməsində, ornament və kompozisiya quruluşunun tədqiqində mühüm rol oynamışdır. Onun irsi xalçaçılıqla məhdudlaşmayaraq milli ornamentikanın və dekorativ düşüncə tərzinin təsviri və dekorativ tətbiqi sənətin müxtəlif sahələrində inkişafına zəmin yaratmışdır.
Sərginin əsas ideyası Lətif Kərimov irsinin müasir sənət dili ilə yenidən dəyərləndirilməsi, milli ornament, xalça kompozisiyası, rəng və forma ənənələrinin çağdaş rəssamların yaradıcılığında necə təzahür etdiyinin nümayişidir. Bu yanaşma sənətkarın irsini tarixi-mədəni dəyərlə yanaşı, müasir yaradıcılıq üçün ilham mənbəyi kimi təqdim edir və müxtəlif sənət növləri arasında yaradıcı dialoq qurur.
Ekspozisiyada milli ornament və xalça sənəti ənənələrinə birbaşa istinadlarla yanaşı, onların müasir bədii təfəkkür əsasında yenidən işlənməsi və yaradıcı şərhi də yer alır. Təqdim olunan əsərlər ənənə ilə müasirlik arasındakı əlaqəni üzə çıxarır, Azərbaycan xalça sənətinin bədii dilinin və milli-mədəni yaddaşının çağdaş yaradıcılıqda davamını əks etdirir.
Ünvan: Bakı şəhəri, Neftçilər prospekti 49A
