“Çapanda ağ-boz atın büdrəməsin” sərgisində yerli və türkiyəli müasir rəssam və heykəltəraşların döyüş atı mövzusunda 50-dən çox əsəri – rəngkarlıq, heykəltəraşlıq, qrafika və dekorativ-tətbiqi sənət nümunələri nümayiş olunur. Layihənin əsas məqsədi Azərbaycan xalqının tarixi yaddaşında və mədəni irsində xüsusi yer tutan döyüş atı obrazını yeni bədii interpretasiyalarda təqdim etməkdir.
Qobustan və Gəmiqaya qayaüstü təsvirlərindən, daş salnamələrimizdən, miniatür sənətindən və monumental rəngkarlıq ənənələrindən ilhamlanaraq yaradılan əsərlərdə Azərbaycan tarixinin şanlı səhifələri və görkəmli şəxsiyyətləri də əksini tapır.
Sərgidə kolleksionerlər Yusif Bağırzadə və İlqar Həsənəlizadənin şəxsi kolleksiyalarından XVII–XXI əsrlərə aid tarixi silah nümunələri və onların replikaları təqdim edilir. Eksponatlar arasında şahzadə Abbas Mirzə Qacarın, II Şah Abbasın, Səfəvi dövlətinin vilayətlərindən birinin hakiminin və Şəki xanlarının istifadə etdikləri silahlar, eləcə də Sultan Uzun Həsən və Şah İsmayıl Xətaiyə aid silahların, həmçinin zülfüqar qılıncı və şaşkanın ənənəvi üsullarla hazırlanmış replikaları yer alır. Döyüş atı mövzusunda süjetlərlə bəzədilmiş ənənəvi formalı sandıq da sərginin diqqətçəkən eksponatlarından biridir.
