Azərbaycanın görkəmli sənətkarı, Xalq artisti, “Şöhrət” ordenli Nurəddin Mehdixanlının 70 illik yubileyinə həsr olunmuş “Sənətə həsr olunmuş ömür” adlı möhtəşəm yubiley gecəsi sənətsevərlərə unudulmaz anlar bəxş edəcək.
Səhnə sənətinə həsr olunmuş ömrün və yaradıcılıq yolunun özünəməxsus hesabatı olacaq gecədə görkəmli mədəniyyət xadimlərinin çıxışları, musiqi nömrələri və sənətkarın vaxtilə rol aldığı tamaşalardan parçalar təqdim olunacaq.
Yubiley gecəsində dünyanın müxtəlif teatrlarından Nurəddin Mehdixanlıya ünvanlanan təbrik mesajları nümayiş etdiriləcək. Bu xüsusi anlar sənətkarın beynəlxalq teatr aləmində qazandığı hörmət və nüfuzun daha bir göstəricisi olacaq.
Rəngarəng proqramı, duyğusal anları və sürprizləri ilə seçiləcək yubiley gecəsi Nurəddin Mehdixanlının səhnədəki çoxillik yaradıcılıq yolunu əks etdirən, sənət hesabatı xarakterli çıxışı ilə yekunlaşacaq.
Bu xüsusi gecənin şahidi olaq və Azərbaycan teatr sənətinin görkəmli siması Nurəddin Mehdixanlının 70 illik ömür yoluna birlikdə nəzər salaq.
