Bu tədbir QR bilet formasında və ya fiziki bilet olaraq şəhərin kassalarında satılır. QR biletlər tədbir günü aktiv olacaqdır. QR biletlərinizi istifadə etmək üçün iTicket.AZ mobil tətbiqində şəxsi hesabınıza daxil olmalısınız.
QR bilet haqqında daha ətraflı: QR bilet
Qəbələ Dövlət Tarix-Bədii Qoruğu
Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin tabeçiliyində fəaliyyət göstərən Qəbələ Dövlət Tarix-Bədii Qoruğu Azərbaycan SSR Nazirlər Sovetinin qərarı ilə 27 mart 1978-ci ildə yaradılmışdır.
Qoruq mədəniyyət və turizmin inkişafı üçün böyük əhəmiyyəti olan tarixi, mədəni, memarlıq, etnoqrafik, arxeoloji abidələrin, tarixi hadisə və şəxsiyyətlərlə bağlı olan xatirə yerlərinin və onların əşyalarının yerləşdiyi ərazini əhatə edir. Qoruq ərazisində Qədim Qafqaz Albaniyasının paytaxtı olmuş Qəbələ şəhərinin qalıqları yerləşir.
Qədim Qəbələ şəhərinin qalıqları yerləşən bu ərazilər Qəbələ rayonu mərkəzindən təxminən 18 km cənub-qərbdə indiki Çuxur Qəbələ və Tövlə kəndləri ərazisində yerləşir. 4-3-cü əsrlərdə Qədim Qafqaz Albaniyasının paytaxtı olmuş Qəbələ haqqında ilk yazılı məlumat eramızın I əsrinə aid Roma alimi Böyük Plininin “Təbii tarix” əsərində Kabalaka (Cabalaca) kimi qeyd edilib. Eramızın II əsrində yaşamış yunan alimi Klavdi Ptolomey isə Qəbələni Xabala kimi verib.
Antik və Orta əsrlər dövrünə aid Qəbələ şəhəri qalıqları geniş ərazini əhatə etməklə, bunlardan 3 mühüm tarixi-arxeoloji hissə Qəbələ Dövlət Tarix-Bədii Qoruğu ərazisinə daxildir.
- Antik şəhər yeri. Tarixi: e.ə. IV əsr - eramızın I əsri.
- Səlbir ərazisi. Tarixi: eramızın I-XII əsrləri.
- Qala ərazisi. Tarixi: eramızın I-XVIII əsrləri.
Ümumilikdə qoruq 420 hektar ərazini əhatə edir ki, bura yuxarıda qeyd olunan sahələrdən əlavə Şəhidlər, Kamaltəpə, Bayır şəhər və digər arxeoloji ərazilər də daxildir. 2005-ci ildən qoruq ərazisində SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının təşəbbüsü, təşkilatçılığı və maliyyə dəstəyi ilə AMEA-nın Arxeologiya və Etnoqrafiya İnstitutunun arxeoloqları, 2009-cu ildən isə Cənubi Koreyadan olan arxeoloqlar arxeoloji qazıntılar aparırlar. Tədqiqatlar nəticəsində müxtəlif mədəni təbəqələrə aid tikili qalıqları və istehsalat ocaqları müəyyən edilib.
Turistlərə tarixi məkanla yanaşı həmçinin bu ərazidə SEBA təşkilatı tərəfindən inşa edilmiş Qəbələ Arxeoloji Mərkəzin nəzdində yerləşən muzeylə tanışlıqlıq imkanı yaradılıb.
Ərazini ziyarət edən turistlərə yaxın məsafədə mövcud olan otel xidmətindən yararlanmaq göl ətrafı meşə ərazisində dincəlmək, çay süfrəsi və milli mətbəxin təamlarından qidalanmaq həmçinin uşaq əyləncə mərkəzindən istifadə etmək istiqamətində mədəni xidmətlər təklif olunur.
Əlavə xidmət növləri:
Sənədli, elmi-populyar filmlərin çəkilişi – 200 manat
Bədii filmlərin çəkilişi – 500 manat
Televiziya verilişlərinin çəkilişi – 200 manat
Klip çəkilişi – 1000 manat
Vertolyotdan çəkiliş – 250 manat
Tədbirlərin keçirilməsi – 500 manat
Abidələrin reklam məqsədli çəkilişi – 500 manat
Fotoreklam üçün çəkilişlər – 500 manat
- BU TƏDBİRƏ ƏLDƏ EDİLƏN BİLETLƏR DƏYİŞDİRİLMİR VƏ YA QAYTARILMIR.
